Thanksgiving Manado, Walikota GSVL pimpin ibadah pake logat Manado di GMIM Bethel Winangun, kreatif skali ekh

  •  
  • 17
  •  
  •  
  •  
  •  

MANADO,  BERITASULUT. CO. ID – Thanksgiving ato biasa orang kenal deng pengucapan syukur yang de beking enteru Kota Manado, Minggu 9 September 2018 hari ini,  da kase tinggal banyak carita.

Amper samua keluarga di Kota Manado ini,  nda pandang dia agama apa, mo Kristen Protestan, Kristen Katolik, Islam, Hindu, Budha, deng Konghucu, ada ba beking Thanksgiving. Serta da ron-ron tadi, ada yang da beking di rumah masing-masing, beking rame-rame di lorong, beking rame-rame di Kantor Kecamatan, deng beking rame-rame di gereja.

Bahkan ada salah satu gereja da beking ibadah kreatif, ibadah pake logat Manado, ada tarian Maengket, sampe depe khadim deng pelsus pake baju khas Minahasa. Iyo, ibadah kreatif tadi siang da beking di GMIM Bethel Winangun. Depe khadim ato yang pimpin ibadah Pnt DR Ir GS Vicky Lumentut SH MSi DEA, Ketua Pria Kaum Bapa GMIM yang juga Walikota Manado.

Pnt GSVL lei ba khotbah deng dialeg Manado. Ba sadur dari MTPJ GMIM minggu berjalan di Alkitab Kejadian 49 ayat 1-29, Pnt GSVL ba pesan pa samua, kalo mo jadi berkat for bangsa dan negara, dimulai dari dalam keluarga. Dalam keluarga saling baku hormat deng baku menghargai. Apalagi anak-anak pa orang tua.

Trus for samua warga Manado, Pnt GSVL yang juga Walikota Manado nda lupa bilang makase karna so beking ni program pemerintah, Manado Fiesta 2018, ba jalan sukses sampe klar.

“Makase samua, Manado Fiesta 2018 so sukses. Taon depan torang mo beking ulang. Depe syukuran sama deng ini di hari terakhir Manado Fiesta torang beking Thanksgiving. Jadi yang ba beking bukang cuma Kristen, mar samua agama di Kota Manado ini,” bagitu Pnt GSVL bilang.

 

Baca Juga:  Vicky Lementut dan Steven Kandouw dipertemukan di Tomohon

Di ibadah kreatif itu, hadir sama-sama antara lain Pnt GSVL pe istri tu Pnt Prof Dr Ir Juleyta PA Lumentut-Runtuwene MS DEA yang juga Wakil Ketua Wanita Kaum Ibu GMIM, ada Penjabat Sekda Kota Manado Peter KB Assa ST MSi DEA, beberapa pejabat Pemkot Manado, Camat Malalayang Deysi Kalalo SE deng depe suami yang juga DirOps PD Pasar Kota Manado Oke Sumual SE, tamu undangan deng tantu katu depe Ketua Jemaat Pdt Roy Lengkong STh.

Bagitu jo dulu, syaloom damai di hati.(DONWU)

Tinggalkan Balasan

Alamat email Anda tidak akan dipublikasikan.